अख्तियार दुरुपयोग अनुसन्धान आयोगले नेपाल प्रहरीका दुई महिला वरिष्ठ उपरीक्षक (एसएसपी) माथि छानबिन थालेको छ । एसएसपीद्वय पूजा सिंह र किरण बज्राचार्यमाथि आर्थिक अनियमितताको आरोपमा अख्तियारले छानबिन थालेको हो । सिंह प्रहरी प्रधान कार्यालय नक्सालको प्रशासन महाशाखा र बज्राचार्य महानगरीय प्रहरी परिसर ललितपुर प्रमुखका रुपमा कार्यरत छन् । एसएसपी सिंहमाथि जिल्ला प्रहरी कार्यालय काभ्रेमा एसपीका रुपमा कार्यरत रहँदा सरुवा भएर जाने प्रहरी कर्मचारीको टिएडिए हिनामिना गरेको आरोपमा उजुरी परेको थियो ।अख्तियार दुरुपयोग अनुसन्धान आयोगले भ्रष्टाचारअभियोगमा नेपाल प्रहरीका दुई एसएसपीमाथि छानविन प्रक्रिया अगाडि बढाएको छ ।

Advertisement 1

एसएसपी बज्राचार्य महानगरीय प्रहरी परिसर भक्तपुमा एसपी हुँदा बेवारिसे शव व्यवस्थापनमा निकासा भएको सरकारी पैसा हिनामिना गरेको आरोपमा उजुरी परेको थियो ।बज्राचार्य ०७२ असोज देखि ०७३ मंसिर सम्म भक्तपुर इञ्चार्ज थिइन् । एसएसपी सिंहमाथि जिल्ला प्रहरी कार्यालय काभ्रेको एसपी हुँदा सरुवा भएर जाने कर्मचारीले पाउने टीएडीए नदिएर आफैंले हिनामिना गरेको आरोप छ ।सरुवा भएर जाने कर्मचारीलाई दिनुपर्ने भत्ता रकम लेखापालसँग मिलेर सिंहले नक्कली हस्ताक्षर गरेर कागजपत्र मिलाएको भन्दै उजुरी परेको थियो ।

सिंह ०७१ भदौदेखि ०७२ असोजसम्म काभ्रेको इञ्चार्ज थिइन् । अहिले उनी प्रहरी हेडक्वार्टरको प्रशासन महाशाखामा कार्यरत छिन् । अख्तियारका प्रवक्ता नारायण प्रसाद रिसालले एसएसपीद्वय बज्राचार्य र सिंहविरुद्ध परेको उजुर उपर छानविन भइरहेको संचारमाध्यममा नै प्रतिक्रिया दिएपछि प्रहरीभित्र भुइचालो गएको छ । पूजा सिंहको उजुरीमा अख्तियारले चासो राखेपछि प्रहरी प्रधान कार्यालयले प्रहरी महानिरीक्षकको सचिवालय अन्तर्गत प्रहरी निरीक्षणालयका एक एसएसपीको कमाण्डमा छानबिन टोली गठन गरेको थियो ।छानबिन टोलीले अध्ययनपछि भ्रष्टाचार गरेको तथ्यसहितको प्रतिवेदन तत्कालीन प्रहरी महानिरीक्षक सर्वेन्द्र खनाललाई बुझाएको थियो ।

Advertisement 2

छानबिन अन्तिम चरणमा पुगिसकेकाले केही दिनमा मुद्दा दायर गर्ने तयारीमा अख्तियार रहेको स्रोतले बताएको छ । प्रहरीका उच्च हाकिमले भ्रष्टाचार गरेका समाचार बेलाबेला बाहिरिने गरेको छ ।