अखाद्य बस्तु विक्री गरेको र मापदण्ड अनुसार पसल सञ्चालन नगरेपछि जिल्ला प्रशासन कार्यालय पाल्पाले तानसेनका सात वटा पसललाई कारबाही गरेको छ । बजार अनुगमनका क्रममा पाल्पा जिल्लामा पहिलो पटक सात व्यापारी नगद जरिवानाको कारबाहीमा परेका हुन् । अग्रहरी गल्ला भण्डार, राधेराधे स्टोर, ज्ञवाली स्टोर, सगुन स्टोर्स, भगवती गल्ला, जैसवाल गल्ला र थापा किराना पसललाई ५/५ हजारका दरले जरिवाना गरिएको छ ।

Advertisement 1

अखाद्य बस्तु विक्री गर्ने, लेवलिङ् नगरिएका सामग्री विक्री गर्ने तथा तौलमा ठगी गर्ने सात वटा पसललाई पाँच हजार रुपियाँ जरिवाना गरिएको प्रमुख जिल्ला अधिकारी बन्धु प्रसाद बास्तोलाले जानकारी दिए । आइतबार तानसेनको मख्खनटोल, सिल्खानटोल, टक्सारटोल, विशालबजार लगायतका क्षेत्रमा बजार अनुगमन गरिएको थियो । उपभोक्ता संरक्षण ऐन–२०७५ अनुसार ती पसलहरूलाई कारबाही गरिएको सहायक प्रजिअ भक्ति सरा रानाले जानकारी दिए । ‘पटकपटक अनुगमन गर्दा पनि अटेरी बढ्न थालेकाले कारबाही गरिएको हो,’ उनले भनिन्, ‘विगतमा दिएको चेतावनीलाई अटेरी गरेको पाइयो ।’ उनले भने, “ऐनअनुसार मूल्य सूची टाँस नभएका, कम तौल विक्री गरेका, लेवलिङ् नभएका, म्याद गुज्रका खाद्य सामग्री विक्री गर्ने पसललाई कारबाहीको दायरामा ल्याएका छौँ ।” अनुगमन गरिएका पसलमध्ये अधिकांश पसल कारबाहीमा परेको प्रशासनले जनाएको छ ।

अनुगमन गरिएका गल्ला पसलमा चामलको बोरामा ७५ देखि २१० ग्रामसम्म कम तौल भएको पाइएको छ । पहिलो चरणमा सामान्य कारबाही गरिएको सहायक प्रजिअ रानाले बताइन् । अनुगमनका क्रममा व्यवसायीलाई सुझावसहित मापदण्ड पालना गर्न निर्देशन दिइएको छ ।