मधेश प्रदेशका पर्यटन विकास कार्यालयका एक इन्जिनियरमाथि कार्यालयमै हातपात तथा दुर्व्यवहार भएको छ। इन्जिनियर मोहमद युनिस राइनलाई सम्पन्न भइसकेको योजनाको भुक्तानी नदिएको भन्दै निर्माण व्यवसायीले कार्यालयमा नै हातपात र दुर्व्यवहार गरेका हुन् ।

Advertisement 1

यो अर्थिक बर्ष ३४ वटा योजनाको भुक्तानी दिएको छैन । भुक्तानी नपाउने योजनासँग सम्बन्धित व्यक्तिहरु बुधबार कार्यालयमा पुगेका थिए । उनीहरुले इन्जिनियर राइन र लेखा अधिकृत नवीन झाले कमिसन मागेको र नदिएका कारण भुक्तानी नदिएको आरोप लगाउँदै आएका छन् । ‘इन्जिनियर राइनमाथि सेवाग्राहीले दुई/तीन झापट हानेका छन्’, प्रत्यक्षदर्शी सेवाग्राही रामकेवल यादवले भने, ‘त्यसपछि त्यहाँ हुने अरुले रोकेका थिए ।’

त्यस्तै तीन साताअघि भएको सवारी दुर्घटनाका विषयमा पीडितका आफन्त र पीडकबीच भइरहेको छलफल सहजीकरणका लागि जिल्ला प्रहरी कार्यालय पुगेका कांग्रेस बाराका सचिव भैयाराम यादव प्रहरी कार्यालयमै प्रहरीबाट कुटिएका छन् । डीएसपी पुरुषोत्तमप्रसाद पाण्डेको आदेशमा इन्स्पेक्टर रुपेश साहलगायतले आफूलाई कुटपिट गरेको यादवले बताए । कुटाइले उनको बायाँ आँखा, कान, तिघ्रा, खुट्टा र ढाडमा गहिरो चोट लागेको छ । उनी उपचारका लागि वीरगन्ज १४ बहुअरीस्थित स्पर्श मल्टीस्पेस्लिटी अस्पतालमा भर्ना भएका छन् । ५० वर्षीय घाइते भैयाराम महागढीमाई नगरपालिका ७ बेनौली निवासी हुन् । कुटपिटपछि प्रहरीले उनलाई केही घण्टा नियन्त्रणमा लिएको थियो ।

Advertisement 2