धनगढी । विगत छ महिनादेखि तलबभत्ता नपाएपछि धनगढी उपमहानगरभित्र कार्यरत स्वास्थ्यकर्मीहरू आइतबारदेखि आन्दोलित भएका छन् । तलबभत्ता यथाशिघ्र पाउनुपर्ने माग गर्दै उनीहरू आन्दोलित भएका हुन् ।
धनगढी उपमहानगरपालिकामा कार्यरत सम्पूर्ण स्वास्थ्य तर्फका स्थायी कर्मचारीहरुले आइतबारदेखि सार्बजनिक बिदाको दिन बाहेक धनगढी उपमहानगरपालिका प्रशासन शाखामा हाजिरी गरेर आफ्ना माग पूरा गर्न हातमा कालो पट्टी बाँधेर दबाबमूलक कार्यक्रम अघि बढाएका हुन् ।
उनीहरुले माग सम्बोधन नहुन्जेलसम्मका लागि दैनिक रुपमा संचालन गरिएका कार्यक्रमहरुको प्रतिबेदन नगर्ने, स्वास्थ्य संस्थाबाट प्रदान गरिने स्वास्थ्य सेवा र बिशेषज्ञ वडा स्वास्थ्य क्लिनिक लगायतका अन्य सेवाहरुमा आन्दोलनरत स्वास्थ्यकर्मीहरु सहभागी नहुने लगायतका दबाबमुलक कार्यक्रममा उल्लेख छ ।
उपमहानगरपालिकामा कार्यरत स्वास्थ्यकर्मीहरूले विगत छ महिनादेखि तलबभत्ता पाएका छैनन् । बिगत ६ महिना देखि सेवासुविधा नपाउदा दैनिक जीवनयापन गर्नमा समेत कठिनाई भइरहेको उनीहरूको भनाई छ ।
उपमहानगरमा कर्मचारी समायोजन हुँदा १६ जना स्वास्थ्य सेवाका कर्मचारीको दरबन्दी कायम गरिएकोमा ५४ जना स्वास्थ्य सेवाका कर्मचारी पुगेपछि ६ महिनादेखि तलबभत्ता रोकिएको छ ।