राष्ट्रिय स्तरका कर्मचारी ट्रेड युनियनहरुले सिंहदरबारभित्रै पर्चा बाढ्नेदेखि मन्त्रालयमा कालो तुल टाँग्न भएका छन् । आज र भोलि सार्वजनिक बिदा भएका कारण पर्सी आइतबारदेखि उनीहरुले मुलुकको प्रमुख प्रशासनिक केन्द्रभित्रै आन्दोलनको दोश्रो चरणको कार्यक्रम गर्न लागेका हुन ।  विगत केही सातादेखि निजामती सेवामा नासु बचाउ अभियानका नाममा तल्ला तहका कर्मचारीहरु आन्दोलित छन् । उनीहरुको माग छ,यथाशीघ्र निजामती ऐन ल्याउन । सोही माग राख्दै अहिले राष्ट्रिय स्तरका कर्मचारी युनियन सञ्जालले आन्दोलनमा उत्रिएका छन् ।
उनीहरुले प्रथम चरणको आन्दोलनले गरेको माग सुनुवाई नभएको भन्दै दोस्रो चरणको आन्दोलनको कार्यक्रम घोषणा समेत गरेका छन् ।

Advertisement 1

दोस्रो चरणका आन्दोलनका माग सुनुवाई नभएमा आन्दोलनलाई थप शसक्त रुपमा अगाडि बढाउन बाध्य हुनेपनि सञ्जालले चेतावनी दिएको छ ।सञ्जालले पहिलो चरणको कार्यक्रम २०७९ भाद्र २ गते सम्पन्न गरेको थियो । आगामी भाद्र ५ गतेदेखि १७ गतेसम्म विरोधका कार्यक्रम सन्जालले सार्वजनिक गरेको हो ।
जसअनुसार सिंहदरवारमा पर्चा वितरण गर्नेदेखि कालो ब्यानर राख्ने र कर्मचारीहरुले हातमा कालोपट्टी बाँधी कामकाज गर्ने, ९ गते प्रतिनिधिसभाका सभामुख र राष्ट्रियसभाका अध्यक्षलाई ज्ञापनपत्र बुझाउनेसम्मको कार्यक्रम घोषणा यस्तै संघीय मामिला तथा सामान्य प्रशासनमन्त्री, मुख्यसचिव र सम्बन्धित सचिवहरुसंग ऐनका विषयमा निरन्तर दवाव सृजना गरिने कार्यक्रमहरु सार्वजनिक गरेको छ ।
सञ्जालमा राष्ट्रिय कर्मचारी संगठन निजामती, नेपाल निजामती कर्मचारी युनियन केन्द्रीय कार्य समिति, एकीकृत सरकारी कर्मचारी संगठन, नेपाल केन्द्रीय कार्य समिति, नेपाल मधेशी निजामती कर्मचारी मञ्च केन्द्रीय कार्य समिति सन्जालमा आबद्ध छन् ।