Advertisement 1

स्थानीय तह निर्वाचनका लागि सोमबार मनोनयन दर्ता प्रक्रिया सकिएको छ । निर्वाचन आयोगले मनोनयन दर्ताका लागि आइतबार र सोमबारको समय दिएकोमा देशैभर मनोनयन दर्तासँगै चुनावी माहोल थप तातिएनमात्र रसुवा जिल्लाको उत्तरगया गाउँपालिकामा त टिकटको बिषयलाई लिएर काँग्रेसभित्र हानाहानै भएको छ ।
उत्तरगया गाँउपालिकाबाट काँग्रेसले पुन उपेन्द्र लम्साललाई अध्यक्षमा उठाएसँगै काँग्रेसभित्रको लफडा सतहमा देखिएको हो । अन्तिम समयमा आएर गठबन्धन भत्काएर एक्लाएक्लै चुनावी मैदानमा होमिने निर्णय भएसँगै रसुवा काँग्रेसले उत्तरगया गाउँपालिकाको अध्यक्षमा उपेन्द्र लम्साल र उपाध्यक्षमा सुनिता गुरुङलाई उठाउने निर्णय गर्यो । सो निर्णयका विरुद्धमा काँग्रेसीहरुबीच हात हालाहाल भएको थियो ।  हात हालाहाल हुँदा पालिकाको ढोकासमेत फुटाइएको छ ।

काँग्रेसको तर्फबाट उत्तरगया गाउँपालिकाको अध्यक्षमा विजय तमाङले आकाक्षा राखेका थिए । यस्तै उपाध्यक्षमा जिल्लामा भिजेकी नेतृ ऋतु ग्याम्दानले आकाक्षा राखेकी थिइन तर अध्यक्ष र उपाध्यक्ष नै काँग्रेसका सांसद तथा ठेकेदार मोहन आचार्य निकटस्थ उपेन्द्र लम्साल र सुनिता गुरुङ हरुले हात पारेपछि त्यहाँ हात हालाहाल भएको थियो ।झगडाले यतिसम्म उग्ररुप लिएको थियो कि वर्तमान अध्यक्ष उपेन्द्र लम्सालको मोवाइल नै खोसेर विप्लव खड्काले नदीमा फालिदिएका थिए ।

Advertisement 2

अहिले उपेन्द्रकै विरुद्धमा काँग्रेसबाट उनै विजय तमाङले बागी उम्मेद्धारी दर्ता गराएका छन् भने उपाध्यक्षमा सृजना तमाङले बागी उम्मेद्धारी दर्ज गराएकी छिन् ।
यस्तै पाँच वटा वडा रहेको उत्तरगया गाउँपालिकाका वडा नम्बर १ बाट भीम बहादुर तमाङले वडा अध्यक्षमा बागी उम्मेद्धारी हालेका छन् भने २ नम्बर वडाबाट जानुका अधिकारीले बागी उम्मेद्धारी दिएकी छिन् ।

यो पालिकाबाट एमालेले अध्यक्षमा केन्द्रीय सदस्य माधव अर्याललाई मैदानमा उतारेको छ भने हालकै उपाध्यक्ष चमेली गुरुङलाई उपाध्यक्षको रुपमा मैदानमा उतारिएको छ । यस्तै माओवादी केन्द्रबाट अध्यक्षमा मेघनाथ घिमिरे प्रभाकर र उपाध्यक्षमा बिञ्जु थापा मगरलाई उम्मेद्धार बनाएको छ । एकीकृत समाजवादीले अर्चना आचार्यलाई अध्यक्षको उम्मेद्धारको रुपमा मैदानमा उतारेको छ ।
पालिकाभित्र जम्मा ५ वटा वडा र ६ वटा निर्वाचन क्षेत्र रहेको छ । जसमध्ये १ नम्बर वडामा १५६८ मतदाता रहेका छन् भने दुई नम्बर वडामा१३६५ मतदाता रहेका छन् । यस्तै निर्वाचन आयोगका अनुसार पालिकाको तीन नम्बर वडाभित्र १२११ मतदाता रहेका छन् । वडा नम्बर ४ मा भने दुईवटा मतदान केन्द्र रहेका छन् । ढुंगे आवासीय विद्यालयमा ९६९ मतदाता रहेका छन भने मालिकादेवी प्रावि मतदान केन्द्रमा ८६७ मतदाता रहेका छन् । सबैभन्दा धेरै मतदाता ५ नम्बर वडामा छन् । त्यहाँ २४१२ मतदाता छन् । उत्तरगया पालिकाको कुल मतदाता संख्या ८ हजार ३९२ रहेका छन् ।

०७४ सालको निर्वाचनको मत परिणामलाई आँकलन गर्दा यो पालिकाको अध्यक्ष काँग्रेसले जितेको थियो । अहिलेका पालिका अध्यक्ष उपेन्द्र लम्सालले १ हजार ६३० मत ल्याएका थिए भने एमालेका अशोक कुमार घिमिरेले १ हजार ४९३ मत ल्याएका थिए । यस्तै माओवादी केन्द्रका मेघनाथ घिमिरे र नयाँ शक्तिका इन्द्रप्रसाद सापकोटाले समान ६९७ मत पाए ।

यस्तै पालिका उपाध्यक्षमा भने एमालेकी चमेली गुरुङले १ हजार ८७८ मत सहित चुनाव जितिन् । काँग्रेसकी शैपकुमारी अधिकारी १ हजार २८५ मतमा सीमित भइन् । माओवादी केन्द्रकी रेनुमाया गुरुङ र नयाँ शक्तिकी चमेली विश्वकर्मा सुनुवारले क्रमशः ६२८ र ६०६ मत पाएका थिए ।
पालिका अध्यक्ष,उपाध्यक्षदेखि वडा वडासम्ममा बागी उम्मेद्धारी परेपछि काँग्रेसलाई सकस पर्ने देखिएको छ ।