नेपाली कांग्रेसले पालिका चुनावका लागि घोषणापत्र सार्वजनिक गरेको छ । पार्टी केन्द्रीय कार्यालय सानेपामा प्रधानमन्त्री तथा नेपाली कांग्रेसका सभापति शेरबहादुर देउवा र शीर्ष नेताहरूले पार्टीको घोषणापत्र सार्वजनिक गरेका हुन् ।
काँग्रेसका महामन्त्री गगन थापाको संयोजकत्वमा बनाइएको घोषणापत्रमा समुन्नत गाउँ, समुन्नत नगर मुख्य नारा दिएर बनाएको घोषणापत्रमा सम्मुन्नत नेपालको जग बसाल्ने वाचा गरिएको छ । घोषणापत्रमा पारदर्शिता र जवाफदेही स्थानीय शासन, सहज र प्रभावकारी सेवा, अनलाइन सेवालाई बढावा, फरक क्षमता भएका, ज्येष्ठ नागरिक, गर्भवती, सुत्केरी र दीर्घरोगीलाई घरघरमै सेवा पुर्‍याउने र सार्वजनिक बिदाको दिन नागरिक एकीकृत सेवा मेला गर्ने कांग्रेसले जनाएको छ ।

Advertisement 1

यस्तै राजस्व स्रोतको रचनात्मक प्रयोग, करको दायरा बढाउने तर दर घटाउने, उद्यम व्यवसायमैत्री कर प्रणाली निर्धारण गर्ने, घरेलु हिंसा, छुवाछुत, दाइजो, धूम्रपान र लागुऔषधलगायतको नियन्त्रण र नियमन गर्ने उल्लेख छ । यस्तै हरेक पालिकामा सुविधा सम्पन्न उत्कृष्टताको केन्द्रको रूपमा एउटा अगुवा विद्यालय बनाउने, विद्यालय छाड्ने दर घटाउने, हरेक पालिकामा व्यावसायिक सीप विद्यालय, निःशुल्क स्यानेटरी प्याड, अभिभावकसँग सहकार्यलगायतका विषय कांग्रेसको घोषणापत्रमा उल्लेख छन् ।

काँग्रेसले पछिल्लो ५ बर्षको समय कर्मचारी व्यवस्थापनमा सरकार असफल भएको निष्कर्ष निकालेको छ । काँग्रेसले आज सार्वजनिक गरेको ८८ पृष्ट लामो घोषणापत्रमा कर्मचारी व्यवस्थापनमा असफल उपशीर्षकमा लेखिएको छ । कर्मचारी समायोजन र व्यवस्थापन नहुँदा संविधानले प्रत्याभूत गरेका अधिकार कार्यान्वयनमा कठिनाइ हुन पुग्यो । समायोजन भएका कर्मचारीको पनि सही व्यवस्थापन हुन सकेन । कतै कर्मचारीको अभाव त कतै बिना काम लामो समयसम्म बस्नुपर्ने अवस्था आयो । कर्मचारीतन्त्रको न पुनर्संरचना भयो न त तिनको सिकाइ र क्षमता वृद्धिमा नै कुनै पहल हुन सक्यो। प्रदेश र स्थानीय तहलाई उपेक्षा गर्दै केन्द्रकै स्वविकेकमा कर्मचारी सरुवा गर्ने पूरानै परिपाटी यथावत रह्यो । फलस्वरुप, स्थानीय तहले प्रदान गर्ने सेवा प्रवाहमा प्रतिकूल असर प¥यो ।

Advertisement 2

संघ, प्रदेश र स्थानीय तहलाई आवश्यक पर्ने जनशक्तिको यथाशीघ्र व्यवस्थापनका लागि ६ महिनाभित्र संघीय तथा प्रादेशिक निजामति सेवा ऐन तथा नियमावलीको तर्जुमा गर्ने बुँदा उल्लेख गरिएको छ । यस्तै काँग्रेसको विधानमा लोकसेवा लगायत सार्वजनिक निकायमा रुची भएकालाई तयारी कक्षा, अन्य पेशा व्यवसायमा रुची भएकालाई तालिम उपलब्ध गराउने बुँदा पनि उल्लेख भएको भेटिएको छ ।
यस्तै काँग्रेसका घोषणापत्रमा हरेक स्थानीय तहमा करारमा कर्मचारी नियुक्ति गर्दा योग्यता पुगेका दलित समुदायका योग्य उमेदवारलाई प्रथामिकताका आधारमा नियुक्ति गर्ने व्यवस्था गर्ने बुँदा उल्लेख गरिएको छ ।
यस्तै काँग्रेसको घोषणापत्रमा नातेदार वा परिवारका सदस्यलाई सल्लाहकार, विज्ञ, कर्मचारी वा सहयोगी नियुक्त नगर्नेदेखि भ्यु टावरमा लगानी नगर्नेसम्मको बुँदा हालिएको छ ।
यस्तै सरकारी सम्पत्तिको दुरुपयोग तथा प्राकृतिक स्रोत–साधनको दोहन गर्दैनौ,गर्न दिने छैनौं भन्ने बुँदा पनि काँग्रेसले घोषणापत्रमा हालेको छ ।