सरकारले नेपाल धितोपत्र बोर्ड (सेबोन)को अध्यक्षमा रमेशकुमार हमाललाई नियुक्त गरेको छ । बिहीबार बसेको मन्त्रिपरिषद् बैठकले हमाललाई धितोपत्र बोर्डको अध्यक्षमा नियुक्त गरेको हो ।

Advertisement 1

राष्ट्रिय योजना आयोगका उपाध्यक्ष डाक्टर विश्वनाथ पौडेलको संयोजकत्वमा गठित छनोट समितिले कृष्णराज पोखरेल, डाक्टर गोपाल भट्ट र रमेशकुमार हमालको नाम सिफारिस गरेको थियो । तीन जनामध्येबाट सरकारले हमाललाई अध्यक्षमा नियुक्त गरेको हो । सरकारले हमाललाई करिब २ वर्षका लागि नियुक्त गरेको हो । सामान्यतया बोर्ड अध्यक्षको कार्यकाल चार वर्षको हुन्छ ।

सरकारले बोर्डका पुर्वअध्यक्ष भिष्मराज ढुङ्गानालाई बर्खास्त गरेपछि खाली भएको पदमा नयाँ अध्यक्ष नियुक्त गरेको हो । यसकारण नवनियुक्त अध्यक्ष हमालको कार्यकाल विस २०८० पुस २४ सम्म मात्र हुनेछ । हमाल इलेक्ट्रिकल इन्जिनियर हुन् । उनले भारतबाट इन्जिनियरिङ र थाइल्याण्डबाट व्यवस्थापनमा एमबीए गरेका छन् ।