दुई मन्त्रालयबीच क्षेत्राधिकारको विवाद
प्रदेश २ मा टुक्रयाएर बनाइएको दुई वटा मन्त्रालयबीच क्षेत्राधिकारलाई लिएर विवाद सुरु भएको छ।
Advertisement 1
नेपाली कांग्रेसको भागमा परेको भौतिक पूर्वाधार विकास मन्त्रालय र खानेपानी तथा उर्जा विकास मन्त्रालयबीच क्षेत्राधिकारलाई लिएर विवाद सुरु भएको हो।भौतिक पूर्वाधार विकास मन्त्री कांग्रेस संसदीय दलका नेता रामसरोज यादव छन् भने उनकै पार्टीबाट ओमप्रकाश शर्मा खानेपानी तथा उर्जा विकास मन्त्री छन् । तर, दुवै मन्त्रालयले एकै डिभिजन कार्यालयलाई छुट्टाछुट्टै निर्देशन दिए पछि विवाद सुरु भएको छ ।
खानेपानी तथा ऊर्जा विकास मन्त्रालयले मातहतका जलश्रोत तथा सिंचाई विकास डिभिजनहरू र भूमिगत सिँचाइका कार्यालयको बोर्ड, लेटरप्याड र छाप परिर्वतन गर्न पत्राचार गरेको छ । भौतिक पूर्वाधार विकास मन्त्रालयले भने ती कार्यालयको बोर्ड, लेटर प्याड र छाप परिवर्तन नगरी पुरानै राख्न निर्देशन दिएको छ ।
Advertisement 2
भौतिक पूर्वाधार मन्त्रालय अर्न्तगत नै जलश्रोत तथा सिंचाई विकास डिभिजन र भूमिगत सिँचाइका कार्यालय कायम रहेकोले बोर्ड, लेटरप्यड र छापमा मन्त्रालयको नाम परिवर्तन नगरी पुरानै अवस्थामा राख्न पत्र पठाएको मन्त्रालयका सचिव दीपककुमार दासले बताए । तर, खानेपानी तथा ऊर्जा विकास मन्त्रालयका शाखा अधिकृत राजाराम मण्डलले प्रदेश सरकारको कार्यविभाजन नियमावली २०७८ ले मन्त्रालयको कार्यक्षेत्रभित्र जलस्रोत, सिँचाइ, खानेपानी, सरसफाइ तथा ऊर्जासम्बन्धी काम गर्ने क्षेत्राधिकार कायम भएको उल्लेख गर्दै कार्यालयको बोर्ड, लेटर प्याड, छाप परिवर्तन गरी मन्त्रालयको मातहत निकायको रूपमा कामकाज गर्न साउन २५ गते पत्राचार गरेको थियो ।
दुवै मन्त्रालयको विवादले विकास निर्माणका कामहरु अन्योलमा पर्ने सम्भावना बढेको छ। कांग्रेस र माओवादी केन्द्रलाई सरकारमा सहभागि गराउन मुख्यमन्त्री लालबाबु राउतले मन्त्रालय फुटाएर तीनवटा मन्त्रालय विस्तार गरेका थिए। जसमध्ये भौतिक पूर्वाधार मन्त्रालयबाट फुटाएर खानेपानी तथा उर्जा विकास मन्त्रालय कायम गरिएको थियो।
Advertisement 3
