सरकारले नेपाल रेल्वे कम्पनी लिमिटेडका महाप्रबन्धक गुरु भट्टराईलाई स्पष्टिकरण सोधेको छ । आचरण विपरितको कार्य गरेको भन्दै गत मंगलबार (१९ साउन) को मन्त्रिपरिषद् बैठकले भट्टराईलाई स्पष्टिकरण सोध्ने निर्णय गरेको हो ।

Advertisement 1

मन्त्रिपरिषद्को सोही निर्णयका आधारमा भौतिक पूर्वाधार तथा यातायात मन्त्रालयले भट्टराईलाई स्पष्टिकरण सोधेको हो । गर्नुपर्ने काम इमानदारीताका साथ नगरी नकारात्मक टिप्पणी गरेको भन्दै उनलाई स्पष्टिकरण सोधिएको छ । सरकारले स्पष्टिकरण सोधेपछि भट्टराईले प्रचण्ड र माधव नेपालको दबाबे काम गरेको बताए । आफूलाई स्पष्टीकरण लिन र पदबाट बर्खास्त गर्न मुख्य रुपमा प्रचण्ड र माधव नेपालको भीषण दबाब रहेको उनले बताए । सामाजिक सञ्जाल फेसबुकबाट उनले यस्तो आरोप लगाएका हुन्। उनले आफू रेल्वेमा व्यक्तिगत चाहनाले होइन, बाध्यताले जागीर खान आएको दाबी गरेका छन्।

उनले प्रचण्ड र माधव नेपाललक्षित गर्दै भनेका छन्, ‘गुरु भट्टराई देखेर तीन कान्ला हाम्फाल्नेहरुले यो देश बनाउँछन् भनेर कल्पना गर्नु ? म लाखौंको जागीर छोडेर ५० हजारको जागीर खान बाध्यताले आएको हो। त्यो बाध्यता मुलुक निर्माण र जनताको खुसहालीको निम्ति हो। मेरो आफ्नै ब्यक्तिगत चाहना हैन।’

Advertisement 2

उनले माधव नेपाललाई मैदानमा हिसाबकिताब गर्ने चेतावनी पनि दिएका छन्। ‘जनहित र लोकतन्त्रको पक्षमा बोल्दा मेरो आचरण खराब भो ? मैले त घोषित रुपमा भनेको हुँ, माधव नेपाल कहाँबाट चुनाव लड्छन्, २ महिना म त्यही बिताउनेवाला छु। मसँग जोरी खोज्ने माकुनेलाई मैदानमा हिसाबकिताब गर्छु। त्यसपछि विपक्षी सरकार बनाउँन हिड्ने यस्ता अराजनीतिक मान्छे कहाँ पुग्छन् प्रष्ट छ,’ उनले भनेका छन्।