प्रधानमन्त्री केपी शर्मा ओलीले शुक्रबार जसपा नेपालको महन्थ–राजेन्द्र पक्षलाई सत्ता साझेदार बनाउँदै मन्त्रिपरिषद पुनर्गठन गर्दै ७ वटा महत्त्वपूर्ण मन्त्रालयको जिम्मेवारी आफैसँग राखेका छन् । प्रधानमन्त्री ओलीले रक्षा, गृह, सञ्चार तथा सूचना प्रविधि मन्त्रालयको जिम्मेवारी आफैसँग राखेका हुन् ।

Advertisement 1

उनले उद्योग, वाणिज्य तथा आपूर्ति मन्त्रालय र कृषि तथा पशुपंक्षी विकास मन्त्रालयको जिम्मेवारी पनि आफैसँग राखेका छन् । यस्तै, संघीय मामिला तथा सामान्य प्रशासन मन्त्रालय र वन तथा वातावरण मन्त्रालयको जिम्मेवारी पनि उनी आफैले राखेका छन् । आफूसँग रहेका ७ वटामा मन्त्री नियुक्तिको तयारी गरेको बालुवाटार स्रोतले जानकारी दियो । ‘छलफल चलिरहेको छ, आज भोलिमै हुनसक्छ,’ स्रोतले भन्यो । प्रधानमन्त्री आफैँले राखेका रक्षा बाहेकका मन्त्रालयमा मन्त्री नियुक्तिको छलफल भइरहेको स्रोतले बतायो । पूर्व माओवादी खेमाका नेताहरूले सम्हालेका र शुक्रवार बिदाइ भएका एमाले मन्त्रीहरूले सम्हालेका मन्त्रालय अहिले ओलीले राखेका छन् ।
कोको बन्दैछन् मन्त्री ?

एमाले उच्च स्रोतका अनुसार खाली रहेका मन्त्रालयमध्ये रक्षा प्रधानमन्त्री ओलीले आफैंसँग राख्ने सम्भावना छ । बाँकी मन्त्रीहरु आजै नियुक्त गरेर आजै सपथ ग्रहण गर्ने तयारी छ ।प्रधानमन्त्री ओलीले गृह मन्त्रालयमा चुनाव गराउन सक्ने भरपर्दो पात्रको खोजी गरेका छन् । यसक्रममा महेश बस्नेतको नाम चर्चामा आएको छ साथै गृहमा कर्ण थापाले पनि दाबी गरेको बुझिएको छ । एमालेका पूर्वसांसद नारदमुनि राना मन्त्री बन्ने पक्का भएको छ । त्यसैगरी पार्वती बिसुंखे र राजबहादुर शाहीको नाम पनि मन्त्रीका रुपमा चर्चामा छ । पूर्वबाट विशाल भट्टराई र राजेन्द्र राई (धनकुटा) को नाम चर्चामा छ । गण्डकीबाट विद्या भट्टराईको नाम पनि चर्चामा छ । तर, खगराजलाई गृहमन्त्री बनाउने अवस्थामा एउटै प्रदेशका दुई जनालाई के गर्ने भन्नेबारे छलफल भइरहेको स्रोतले बतायो । राष्ट्रियसभामा पराजित पूर्वमाओवादीका चन्द्रबहादुर खड्कालाई मन्त्री बनाएर पूर्वमाओवादीको चित्त बुझाउने तयारीमा प्रधानमन्त्री ओली लागेका छन् ।

Advertisement 2

सर्वोच्च अदालतमा मुद्दा विचाराधीन रहेका बाहेक पूर्वमाओवादीबाट एमालेमा आएका रामबहादुर थापा, टोपबहादुर रायमाझी समूहबाट पनि मन्त्रीमा समेटिन सक्ने स्रोतले बतायो ।