झापा। पर्यावरण संरक्षण र फलफूलमा परनिर्भरता घटाउने उद्देश्यले नेपाल कम्युनिष्ट पार्टी (एमाले) झापाले प्रत्येक सदस्यको घरमा अनिवार्य फलफूलको बिरुवा रोपण गर्ने अभियान सञ्चालन गरेको छ।

Advertisement 1

एमालेले जिल्लाका १५ वटै पालिकामा बिरुवाको व्यवस्थापन गरेर सदस्यहरुलाई बिरुवा रोपण कार्यमा सरिक गराइरहेको पार्टीका जिल्ला सचिव तुलसी कार्कीले बताए। उनले भने, “हरेक सदस्यलाई पार्टीले नै बिरुवाको व्यवस्था गरेर आफ्ना खाली जमिनमा फलफूलको बिरुवा लगाउन अभिप्रेरित गरिरहेका छौँ।”

यसबाट फलफूलको परनिर्भरता घटाउन समेत मद्दत पुग्ने हुँदा पार्टीले विभिन्न सङ्घसंस्था र डिभिजन वन कार्यालयसँग बिरुवा अनुदानमा लिएर सदस्यलाई वितरण गरिरहेको सचिव कार्कीले बताए। जिल्लामा करिब ५० हजार पार्टीका सदस्यको घरमा बिरुवा रोप्ने लक्ष्य छ।

Advertisement 2

चालु आर्थिक वर्षको साउनदेखि असोजसम्ममा करिब १ लाख बिरुवा रोप्ने लक्ष्य रहेको सचिव कार्कीले जानकारी दिए। “लिची, आँप, कागती, जामुनलगायतका फल्ने बिरुवा रोपिरहेका छौँ”, उनले भने।

निजी वन हुर्काउन चाहनेहरु, वृक्षरोपण अभियान सञ्चालन गर्ने सामाजिक सङ्घसंस्थाहरु र राजनीतिक दलहरुले कार्यालयमा निवेदन दिएर बिरुवा माग गर्दै आएका र आवश्यकता पहिचान गरेर बिरुवा उपलब्ध गराउँदै आएको डिभिजन वन कार्यालयका प्रमुख भरतबाबु खड्काले बताए। आगामी ३ वर्षमा वडाका हरेक घरअगाडि र सडक किनारमा छाँयादार, हरियाली र फल फल्ने बिरुवा हुर्काउने कार्यक्रम छ।

यसैगरी, राष्ट्रिय युवा सङ्घ नेपालले ‘संरक्षण प्रकृतिको, सुरक्षा सन्ततिको’ नारासहित चालु आर्थिक वर्षको १ महिने वृक्षरोपण अभियान सञ्चालन गरिरहेको छ। सङ्घका केन्द्रीय सदस्य तथा झापा इञ्चार्ज खगेन्द्र आङ्दम्बेले उद्यान, सामुदायिक वन र सडक किनारमा बिरुवा रोप्ने काम गरिरहेको जानकारी दिए। यसैबीच नेपाल कम्युनिष्ट पार्टी (माओवादी केन्द्र)ले समेत गत वर्ष अभियान सञ्चालन गरेर जिल्लामा विभिन्न प्रजातिका ५० हजार बिरुवा रोपेको थियो।