वैदेशिक रोजगारबाट फर्किएर देशमै उद्यम गर्ने ९ युवा सम्मानित
वैदेशिक रोजगारीबाट फर्किएर देशमै उद्यम गरिरहेका नौ जना युवाहरूलाई सरकारले सम्मान गरेको छ। बिहीबार भर्चुअल कार्यक्रम आयोजना गरी श्रम, रोजगार तथा सामाजिक सुरक्षा मन्त्रालयले उनीहरूलाई सम्मान तथा राष्ट्रिय पुरस्कार प्रदान गरेको हो।
Advertisement 1
रु एक लाख राशिको उत्कृष्ट उद्यमी राष्ट्रिय पुरस्कारबाट रुपन्देहीका शिव पराजुली पुरस्कृत भएका हुन् । बाह्र वर्ष कतार बसेर स्वदेश फर्किएका उनले रुपन्देहीमा सूर्या इन्डष्ट्रिज स्थापना गरी ६० भन्दा बढीलाई प्रत्यक्ष रोजगारी दिएका छन् । उनले पित्तलको धारा उत्पादन गर्दै आएका छन्। रु ५० हजार राशिको उद्यमी राष्ट्रिय पुरस्कारबाट सोही जिल्लाका भुदुरप्रसाद थारु, मोरङका सनोजकुमार माझी, कास्कीका भोजराज पुवाली, सुनसरीका धनबहादुर राई र शम्भुराज राई, नवलपरासीका गोविन्दनन्द महतो, चुरामणि चौधरी र ज्ञानेन्द्र सम्बाहाम्फे पुरस्कृत भएका छन् ।
थारूले फर्निचर उद्योग सञ्चालन गरी आठ जनालाई प्रत्यक्ष रोजगारी दिएका छन् । यस्तै माझीले कृषि फर्म सञ्चालन गरी ६ जनालाई रोजगारी दिएका छन् । उनले फर्ममा रु ४० लाख बढी लगानी गरेका छन् । पुवालीले पशुपालन, तरकारी र मौरीपालन, धनबहादुर र शम्भुराजले संयुक्तरुपमा पशुपालन तथा तरकारी खेती, महतोले सिमेन्ट सामग्री उद्योग, चौधरीले माछापालन व्यवसाय र सम्बाहाम्फेले कृषि व्यवसाय गरेका छन् । पुरस्कार रकम सम्बन्धितको बैंक खातामा हस्तान्तरण गरिने मन्त्रालयले जनाएको छ ।
Advertisement 2
कार्यक्रममा श्रम, रोजगार तथा सामाजिक सुरक्षामन्त्री गौरीशङ्कर चौधरीले सरकारले बाध्यकारी वैदेशिक रोजगारी अन्त्य गर्ने लक्ष्य लिएको उल्लेख गर्दै स्वदेशमै रोजगारी सिर्जना र स्वरोजगारका वातावरण बनाउन सरकार लागिपरेको बताए ।
