नेपाल कम्युनिष्ट पार्टी एमालेका वरिष्ट नेता माधवकुमार नेपाल नयाँ पार्टी गठन गर्ने अन्तिम तयारीमा पुगेका छन्। उनी महिना दिनभित्रै नयाँ पार्टी गठन गर्ने तयारीमा जुटिरहेका छन् । प्रधानमन्त्री तथा पार्टी अध्यक्ष केपी शर्मा ओलीले एक पछि अर्काे सदस्यहरुलाई निलम्बन गरेपछि संसदको सबैभन्दा ठूलो पार्टी विभाजनको मुखमा पुगेको हो । प्रधानमन्त्री केपी शर्मा ओलीले माधव कुमार नेपाल,भिम रावल, सुरेन्द्र पाण्डे,घनश्याम भुषाल लगायतका नेताहरुलाई ६ महिनाको लागि निलम्बन गरिएसँगै एमाले विभाजनको संघारमा पुगेको हो । जस अनुरुप नेपाल पक्षले समान्तार कमिटि निर्माणमा लागेको छ । जस अनुसार नेपाल खेमाले अखिल नेपाल महिला संघ, युवा संघ र अनेरास्ववियूको राष्ट्रिय कार्यकर्ता भेला राखेर अलग केन्द्रिय कमिटी बनाइ सकेको छ।
यस अघि नै खनाल–नेपाल समूहले यसअघिनै हरेक प्रदेशमा संयोजक तोकिसकेको छ। नेता सुरेन्द्र पाण्डेलाई गण्डकी प्रदेशको संयोजक बनाएको छ । पाण्डेको संयोजकत्वमा गण्डकी प्रदेशका सबै जिल्लामा समानान्तर कमिटीसमेत गठन भइसकेका छन् । जस अनुसार कास्कीमा धनराज आचार्य, स्याङ्जामा रामचन्द्र भट्टराई, म्याग्दीमा बालकृष्ण सुवेदी, बागलुङमा इन्द्रलाल सापकोटा, पर्वतमा भक्त कुँवर, तनहुमा शंकरनारायण श्रेष्ठ अध्यक्ष चयन भएका छन् । यसअघि यो समूहले भीम आचार्यलाई प्रदेश १, घनश्याम भुसाललाई प्रदेश २, अष्टलक्ष्मी शाक्यलाई बागमती, युवराज ज्ञवालीलाई लुम्बिनी र कर्णाली तथा भीम रावललाई सुदूरपश्चिम प्रदेश इन्चार्जको जिम्मेवारी दिएको छ । यस्तै रघुजी पन्तले युवा, गोकर्ण विष्टले विद्यार्थी, प्रमेश हमालले बुद्धिजीवी र योगेश भट्टराईले प्रचार विभाग प्रमुखको जिम्मेवारी पाइसकेका छन। यस्तै प्रदेश १ मा ताप्लेजुङ, पाँचथर, भोजपुर र खोटाङमा पनि समानान्तर जिल्ला कमिटी बनिसकेका छन्। यसरी नेपाल नेतृत्वको नेकपा एमालेले अब ७७ वटै जिल्लामा कमिटी बनाएर काम थाल्ने तयारी गर्दैछ । देशभर एक महिना भित्रै समानान्तर कमिटी बनाइ सक्ने माधव नेपाल पक्षधरको तयारी छ । वैशाख महिनाभर टोल कमिटीदेखि केन्द्रसम्म पार्टी निर्माण गरिने र त्यसपछिको बाटो तय हुने सो पक्षधर नेताहरुको दावा छ ।

Advertisement 1

Advertisement 2