बालसाहित्यकार देवराज सिम्खडाको ६ वटा बालकविता संग्रह एकसाथ लोकार्पण गरिएको छ। ‘हाम्रो दिवस’, ‘हाम्रो जलसम्पदा’, ‘हाम्रा महिनाहरू’, ‘मामाघरमा एकदिन’, ‘साथी’ र ‘हाम्रा चाडपर्व’ बालपुस्तक शुक्रबार सार्वजनिक गरिएको हो।

Advertisement 1

टोखानगरपालिकास्थित सरस्वती माविको प्रांगणमा भएको कार्यक्रममा नगरपालिकाका मेयर प्रकाश अधिकारी, उपमेयर मुरारी तामाङ, शिक्षा प्रमुख खगेन्द्र सिंह धामी, बालसाहित्यकार छायादत्त न्यौपाने र मनमैजु सांस्कृतिक समाजका अध्यक्ष ध्रुवराज खड्कालगायत विद्यालयका विद्यार्थीहरूले पुस्तक लोकार्पण गरेका हुन्।

Advertisement 2

लोकार्पित ‘हाम्रा जलसम्पदा’ पुस्तकमा नेपाली भूगोलमा रहेका विभिन्न तालहरूको परिचय दिइएको छ। ‘हाम्रा महिनाहरू’ मा १२ महिनाको चिनारी गरिएको छ। ‘हाम्रा चाडपर्व’ पुस्तकमा नेपालीहरूले मनाउने प्रमुख चाड तीज, दसैं, ल्होछारलगायत पर्वहरूको चर्चा गरिएको छ। यस्तै नेपालमा मनाइने सहिद दिवस, आमा दिवस, संविधान दिवसलगायतबारे पुस्तक ‘हाम्रा दिवस’मा उल्लेख छ।

लेखक सिम्खडाले पुस्तक कोभिडको समयमा लेखेको जानकारी दिए। सूचना प्रविधि विकासले अहिलेको पुस्ता विकृतितर्फ लागिरहेको बताउँदै साहित्यकार सिम्खडाले सबै बालबालिकाहरूलाई देशको असल नागरिक बनाउन सानैदेखि राम्रो साहित्यको अध्ययन गराउन आवश्यक रहेको बताए।

को हुन् बालसाहित्यकार देवराज सिम्खडा ?
लेखक सिम्खडा विद्यालय तहको शैक्षिक उज्यालोले बालबालिकाहरूको भविष्य उजिल्याउने कर्ममा विगत लामो समयदेखि समर्पित स्रष्टा हुन् । उनको जन्म विसं २०२४ साल धादिङ जिल्लाको मार्पाकमा भएको हो । उनी उच्च शिक्षा अध्ययन गर्दै गर्दा बालबालिकाहरूसँग नजिकिए। उनी २०४६ सालदेखि विद्यालय तहको शिक्षण कर्ममा समर्पित भएको देखिन्छ । उनी यो वर्षौं लामो शिक्षण गतिविधिमा संलग्न हुँदै गर्दा विभिन्न सामुदायिक विद्यालयहरूका हजारौँ विद्यार्थीहरूका आदरणीय शिक्षक, जिम्मेवार प्रधानाध्याकको भूमिका सफलतापूर्वक निर्वाह गरी कुशल मार्गदर्शक बन्दै आएका छन् । उनी विद्यार्थीहरूको मन मस्तिष्क सजाउँदै सचेत नागरिक बनाउने अभ्यासमा लागिरहेको पाइन्छ । उनले व्यावहारिक शिक्षाको माध्यमबाट विद्यार्थीहरूको मनोविज्ञानलाई सूक्ष्म अध्ययन, अवलोकन गरी शैक्षिक उपलब्धि हासिल गराउँदै आएका छन् । उनले आजका बालबालिकाहरूको सोच र व्यवहारमा के(कसरी सकारात्मक परिवर्तन ल्याउन र सिर्जनशील कर्ममा अघि बढाउन सकिन्छ भनेर गरेको प्रयत्न प्रशंसनीय देखिन्छ ।

सिम्खडाले विद्यालय तहका पाठ्यसामग्री निर्माणमा पनि स्थानीय निकायहरूसँग समन्वय गर्दै आएका छन् । बालमन राम्ररी बुझेका स्रष्टा सिम्खडाले बालबालिकाहरूलाई देश, समाज र परिवारप्रति जिम्मेवार बन्न प्रेरित गर्दै आएको देखिन्छ । कर्मशील सिम्खडाले बालपाठकहरूका निम्ति कथा, कविताहरू सिर्जना गर्दै आएका छन् । उनले रचेका बाल पाठ्यसामग्री बालकहरूको मन, रुचि र क्षमता अनुकूल सरल हुन्छन् । उनी सूचनामूलक सामग्री लेखन र प्रकाशनमा रुचि राख्ने सिर्जनशील प्रतिभाका रूपमा देखा परेका छन् । उनको यो ‘हाम्रा जलसम्पदाु कृतिमा नेपाली प्रकृतिले सजाउँदै ल्याएको हाम्रो जलसम्पदाबारे सुन्दर वर्णन गरिएका लयात्मक रचना समावेश छन् । यसमा नेपाली भूगोलमा रहेका विभिन्न तालहरूको परिचय दिने प्रयत्न गरिएको छ । वास्तवमा जलसम्पदा भनेको सृष्टि सौन्दर्यलाई जीवन्त तुल्याउने महत्त्वपूर्ण सम्पदा हो । यसको जतन र सम्बर्द्धन गर्नु हामी सबै नेपालीको साझा दायित्व हुन्छ ।

यस कृतिमा समस्त नेपालीको कर्तव्य जलसम्पदाको संरक्षण गर्नु हो भन्ने अन्तर्यमा जोड दिएको पाइन्छ । कृति प्रकाशनको यस सुखद घडीमा बधाई ज्ञापन गर्दै स्रष्टा सिम्खडाको सिर्जन यात्रा निरन्तर अघि बढोस् भन्ने कामना गर्दछ ।