संसदको कार्याकाल सकिन पाँच महिना बाँकी रहँदा उपसभामुखको निर्वाचनको मिति तोकिएको छ । झण्डै साढे दुई बर्षदेखि उपसभामुखबिहिन रहँदै आएको प्रतिनिधि सभाले उपसभामुख चुन्ने भएको हो । पर्सी शुक्रवार प्रतिनिधि सभाको उपसभामुखका लागि निर्वाचन गर्न लागेको हो ।
प्रतिनिधि सभाको तत्कालीन उपसभामुख शिवमाया तुम्बाहाङ्फेले राजीनामा दिएसँगै उपसभामुख पद रिक्त रहँदै आएको छ । तत्कालीन सभामुख कृष्णबहादुर महराले सभामुख पदबाट राजीनामा दिएसँगै तत्कालीन नेकपा तर्फबाट अग्निप्रसाद सापकोटा सभामुख बनेका छन् । संविधानअनुसार एउटै दलबाट सभामुख र उपसभामुख हुन नपाइने व्यवस्थाका कारण तत्कालीन उपसभामुखले पदबाट राजीनामा दिएसँगै सो पद रिक्त रहँदै आएको थियो ।
उपसभामुखको निर्वाचन शुक्रबार दिउँसो १ बजे हुने कार्यतालिका सार्वजनिक भएको छ । संघीय संसद सचिवालयका अनुसार उपसभामुखको निर्वाचनका लागि मनोनयन दर्ता भोलि र निर्वाचनको मिति पर्सी शुक्रवारका लागि तोकिएको छ । सचिवालयले सार्वजनिक गरेको कार्यतालिका अनुसार भोलि बिहानै ११ बजेदेखि दिउँसो १ बजेसम्म मनोनयन दर्ताको समय तोकिएको छ। त्यस्तै, साढे एक बजे दर्ता भएका उम्मेदवारिको सूचनाको दर्ता क्रमानुसार सूची प्रकाशन गरिने कार्यतालिका रहेको छ भने शुक्रबार दिउँसो ३ बजे प्रारम्भ हुने प्रतिनिधि सभाको बैठकमा प्रतिनिधि सभाको बैठकमा उपसभामुख पदमा निर्वाचित गरियोस् भनी प्रस्तावकले प्रस्ताव गर्ने र समर्थकले समर्थन गर्ने, उम्मेदवारीको सूचनामाथि सामूहिक रुपमा छलफल हुने र दर्ता क्रमानुसार निर्णयार्थ प्रस्तुत गर्ने कार्यसूची सार्वजनिक गरिएको छ ।