प्रधानमन्त्री शेरबहादुर देउवाले मन्त्रिपरिषद्मा हेरफेरको तयारी थालेको खबर हिजो दिनभर चर्चाको बिषय बन्यो । एकीकृत समाजवादी र जनता समाजवादीका मन्त्रीहरुलाई फिर्ता बोलाएर हिजै नयाँ मन्त्रीहरुको शपथ खुवाइने तयारी थियो । जसअनुसार एकीकृत समाजवादीबाट मन्त्रीको जिम्मेवारीमा जीवनराम श्रेष्ठलाई पर्यटन, शेरबहादुर कुँवरलाई श्रम, भवानी खापुङलाई स्वास्थ्य, मेटमणि चौधरी शहरी विकास र हिरा केसीलाई स्वास्थ्य राज्यमन्त्रीको जिम्मेवारी दिने तयारी चल्दै थियो । बहालरत रहेका मन्त्रीहरु विरोध खतिवडा, रामकुमारी झाँक्री, प्रेम आले र कृष्णकुमार श्रेष्ठलाई फिर्ता बोलाएर उनीहरुलाई जिम्मेवारी दिन लागिएको थियो ।

Advertisement 1

तर साँझ शीतल निवासमा नयाँ मन्त्रीहरुको शपथ गर्ने कार्यक्रम मिलाईंदै गर्दा एकाएक कार्यक्रम रोकिन पुगेको छ ।  साँझदेखि मन्त्रीको जिम्मेवारीबाट मुक्त हुने भनिएका नेकपा एकीकृत समाजवादीका केही मन्त्री राती अबेर प्रचण्ड निवास खुमल्टारमा देखिए । एक जना राज्यमन्त्रीसहित पार्टीको तर्फबाट मन्त्री बनेका पाँच जनाको सट्टा अरु चार जनालाई शपथ खुवाउने तयारी चल्दै गर्दा नयाँ परिस्थिति सिर्जना भएको हो ।

समाजवादीले पार्टीभित्रको आन्तरिक भागबण्डा मिलाउन पूराना मन्त्रीलाई फिर्ता बोलाएर नयाँ अनुहारलाई सरकारमा पठाउन प्रधानमन्त्री शेरबहादुर देउवालाई नाम सिफारिस गरेपछि राजनीतिमा नयाँ तरंग पैदा भएको छ । गत असोजमा मन्त्री नियुक्त भएकाहरुको सेट नै फिर्ता बोलाएर नयाँ सेटलाई मन्त्रीमण्डलमा सहभागी हुन नाम सिफारिस गरेपछि तरंग पैदा भएको हो । अध्यक्ष माधव कुमार नेपालले पार्टी सचिवालयको बैठक राखेर मन्त्री फिर्ता बोलाउने र नयाँको नाम सिफारिस गरे लगतै प्रचण्ड निवास खुमलटारमा पुगेका थिए । माधव नेपाल र प्रचण्डको भेटवार्ता सकिएलगत्तै मन्त्री फिर्ता बोलाएका विरोध खतिवडा र रामकुमारी झाँक्री पनि प्रचण्ड निवास पुगेका छन् ।नेपाल त्यहाँबाट निस्केलगत्तै शहरी विकासमन्त्री तथा एकीकृत समाजवादीकी केन्द्रीय सचिव रामकुमारी झाँक्री र स्वास्थ्यमन्त्री विरोध खतिवडा माओवादी अध्यक्ष प्रचण्डसँग भेटघाट गर्न त्यहाँ पुगेको बताइन्छ । दाहाल र नेपालवीच सवा पाँच बजेबाट पौने ७ बजेसम्म भेटवार्ता भएको हो भने त्यसपछि रामकुमारी र विरोध खतिवडा ८ देखि पौने नौ बजेसम्म खुमल्टारमा थिए ।