काठमाडौं। कानुन, न्याय तथा संसदीय मामिला मन्त्रालयको संगठन तथा व्यवस्थापन (O&M ) सर्वेक्षण टुङ्गिएको छ। स्वीकृत संरचनाअनुसार तयार गरिएको नयाँ दरबन्दी विवरण राष्ट्रिय किताबखानामा समेत दर्ता भइसकेको छ।

Advertisement 1

नयाँ O&M अनुसार मन्त्रालयको कुल दरबन्दी १०५ बाट घटाएर ९६ कायम गरिएको छ। पुनर्संरचनासँगै ९ कर्मचारीको दरबन्दी कटौती गरिएको हो।

दरबन्दी संरचनाअनुसार मन्त्रालयमा एक सचिव, ६ सहसचिव, १६ उपसचिव र २९ शाखा अधिकृत रहनेछन्। त्यस्तै, नायब सुब्बा तहमा २२ दरबन्दी कायम गरिएको छ।

समूहगत रूपमा न्याय समूहका २०, लेखा समूहका २, पुस्तकालय विज्ञानका २, इन्जिनियरिङ सेवाका २, कम्प्युटर अपरेटर ५ तथा सामान्य प्रशासन समूहका ७ जना रहने व्यवस्था गरिएको छ।

मन्त्रालयले संगठन संरचनालाई कार्यबोझ र आवश्यकताअनुसार पुनर्संरचना गर्दै अनावश्यक दरबन्दी घटाएको जनाएको छ। नयाँ संरचना किताबखानामा दर्ता भएसँगै अब सोहीअनुसार कर्मचारी व्यवस्थापन तथा पदपूर्तिको प्रक्रिया अघि बढ्नेछ।

पछिल्लो समय सरकारले विभिन्न मन्त्रालय तथा विभागको संगठन तथा व्यवस्थापन (O&M ) पुनरावलोकनलाई तीव्र बनाइरहेको छ। सोही अभियानअन्तर्गत कानुन मन्त्रालयको संरचनासमेत पुनर्संयोजन गरिएको हो।