अपेक्षा ७०, खस्यो ६१ प्रतिशतमात्र
आज सम्पन्न संघीय र प्रदेश सभा निर्वाचनमा ६१ प्रतिशत मत खसेको प्रमुख निर्वाचन आयुक्त दिनेश थपलियाले जानकारी दिएका छन् ।
Advertisement 1
केहीबेर अघि बहादुर भवनमा पत्रकार सम्मेलन गरि उनले आयोगले अपेक्षा गरेभन्दा कम मत खसेको जनाएका हुन ।
अस्तिमात्र थपलियाले ७० प्रतिशतभन्दा बढीले मतदान प्रक्रियामा भाग लिने अपेक्षा गरेका थिए तर आज सम्पन्न निर्वाचनमा ६१ प्रतिशत मत खसेको र यो आयोगले गरेको अपेक्षाभन्दा कम रहेको बताएका हुन् ।
पछिल्ला निर्वाचनमा मतदान गर्नेको संख्या प्रतिशतमा घट्दै गएको छ । २०४८ को आमनिर्वाचनमा ८८ दशमलव १ प्रतिशत मतदान भएको थियो । त्यसपछि ०५१ मा ८६ दशमलव ७ प्रतिशत र २०५४ मा ८८ दशमलव १ प्रतिशत मत खसेकोमा त्यस यताको निर्वाचनमा मतदान घट्दै गएको देखिन्छ ।
०५९ मा ६५ दशमलव ८ प्रतिशत, २०६४ मा ६३ दशमलव ३ प्रतिशत, २०७० मा ७८ दशमलव ३ प्रतिशत खस्दा ०७४ को निर्वाचनमा झण्डै ६९ प्रतिशत मत खसेको थियो भने गत वैशाख ३० मा सम्पन्न स्थानीय तहको निर्वाचनमा ६५ प्रतिशतले मतदान गरेको आयोगको तथ्याङ्क छ।
यस पटक ६१ प्रतिशतमात्र मत खसेको आयोगले जनाएको छ ।
Advertisement 2
सुर्खेत, नवलपरासी, गुल्मी र बाजुराका १५ स्थानमा मतदान स्थगन भएको उल्लेख गर्दै ती ठाउँमा २ दिनभित्र सबै विवादको समाधान गरी पुनः मतदानको व्यवस्था मिलाउन निर्वाचन अधिकृतहरुलाई निर्देशन दिइसकिएको थपलियाले जनाएका छन् ।
