काठमाडौं। नेपाल सरकारले कायम मुकायम मुख्यसचिव लीलादेवी गड्तौलालाई बिहीबार मुख्य सचिवमा नियुक्त गरेको छ। मुलुकको प्रशासनिक इतिहासमा उनी नै प्रथम महिला मुख्यसचिव हुन्। सरकारले नै उनलाई असार ३१ गते निमित्त मुख्यसचिवबाट कामु मुख्यसचिवको जिम्मेवारी दिएको थियो। विसं २०२३ साल भदौ १५ मा तेह्रथुममा जन्मेकी गड्तौला विसं २०५२ मा नेपालको निजामति सेवाको न्याय समूहको शाखा अधिकृतबाट राष्ट्र सेवामा प्रवेश गरेकी हुन्।

Advertisement 1

उनी विसं २०६३ मा उपसचिव, विसं २०७० मा सहसचिव, २०७७ मा सचिवमा बढुवा भएकी हुन्। उमेर हदका कारण उनी आउँदो भदौ १५ बाट सेवा निवृत्त हुनेछन्।
‘जस्तो कर्म ग¥यो, त्यस्तै फल प्राप्त हुन्छ’ भन्ने विश्वास राख्ने नवनियुक्त मुख्यसचिव गड्तौलाले निजामति सेवामा राम्रै कर्म गरेको परिणामका रूपमा यो जिम्मेवारी प्राप्त भएको प्रतिक्रिया दिइन्।

‘प्रधानमन्त्री केपी ओलीको नेतृत्वको सरकारको पहिलो मन्त्रिपरिषद्ले मलाई कामु मुख्यसचिवको जिम्मेवारी दिएको थियो,’ उनले भनिन्, ‘दश दिनपछि मुख्यसचिवमा नियुक्त गरेको छ। यो सरकार महिलाप्रति उद्धार छ भन्ने देखियो, न्याय सेवाको कर्मचारीलाई मुख्यसचिवको जिम्मेवारी दिनुभएको छ, सरकारलाई धन्यवाद छ।’ इमान्दार भएर काम गरेमा कही न कही मूल्यांकन र अवसर प्राप्त गर्ने रहेछ भन्ने सन्देश समस्त निजामति कर्मचारीमा गएको बताउँदै मुख्यसचिव गड्तौलाले महिलालाई माथिल्लो तहको जिम्मेवारीमा दिन हिचकिचाउँछन् भन्ने भाष्य परिवर्तन हुँदै गएको बताइन्।

Advertisement 2

निजामति कर्मचारीमा प्रवेश गरेका कर्मचारीमा मुख्यसचिव बन्ने लक्ष्य हुने गरेको उनले बताइन्। ‘त्यसमा कोही पुगिन्छ, कोही पुगिन्न। कोही सचिव र सहसचिवमा पुगिन्छ, कोही तलैबाट बाहिरिनुपर्छ,’ उनले भनिन्, ‘भाग्यछ भन्दैमा डोकोमा दूध अडिन्न, कर्म गर्नुपर्छ, राम्रो कर्म गरे राम्रो फल पाइन्छ।’

राज्यबाट जनतालाई प्रदान गरिने सेवाप्रवाहमा सहज र सरल तुल्याउन सम्पूर्ण राष्ट्रसेवक निजामति कर्मचारी मिलेर काम गर्नुपर्ने आवश्यकता रहेको उनले बताइन्। संसद्मा अड्किरहेको निजामति विधेयकलाई अघि बढाउन र राम्रो कर्म गर्ने कार्यलाई प्रोत्साहन तथा प्रेरणा प्रदान गर्न लागि पर्ने दृढता उनले व्यक्त गरिन्।