प्रधानमन्त्री पुष्पकमल दाहाल प्रचण्ड स्वदेश फर्कनुभएको छ । उहाँ संयुक्त अरब इमिरेट्सको दुबईबाट फ्लाई दुबईको उडान नम्बर एफजेड ५७५ मा साँझ सवा ६ बजे काठमाडौं आइपुग्नुभएको हो ।

Advertisement 1

उहाँ संयुक्त राष्ट्रसंघीय जलवायु परिवर्तन सम्बन्धी सम्मेलनमा भाग लिन गत बुधबार ३० जनाको टोलीको नेतृत्व गर्दै त्यसतर्फ जानुभएको हो । नेपाली टोली नेपाल वायुसेवा निगमको उडानमा त्यता गएको थियो ।

प्रधानमन्त्रीको स्वागतका निम्ति त्रिभुवन अन्तर्राष्ट्रिय विमानस्थलको अति विशिष्ट कक्षमा सभामुख देवराज घिमिरे, उपप्रधानमन्त्री तथा रक्षामन्त्री पूर्णबहादुर खड्का, उपप्रधानमन्त्री तथा गृहमन्त्री नारायणकाजी श्रेष्ठ, परराष्ट्रमन्त्री नारायणप्रकाश साउद, मन्त्रिपरिषद्का सदस्य, सांसद, निजामती तथा जङ्गी सेवाका वरिष्ठ अधिकारी, यहाँस्थित यूएईको राजदूतावासका उच्च अधिकारी उपस्थित थिए।

Advertisement 2

सम्मेलनमा प्रधानमन्त्री ‘प्रचण्ड’ शुक्रबार र शनिबार विभिन्न बैठकहरूमा सहभागी हुनुभएका थिए। शनिबार उनले कोप २८ लाई सम्बोधन गर्दै विकसित देशहरूका कारण नेपालजस्तो कम विकसित मुलुकहरूले जलवायु परिवर्तनको मार खेप्नु परेको बताउनु भयो ।