अन्तिम राणा प्रधानमन्त्रीका नातीलाई गणतन्त्रकालीन सांसदहरुलाई शपथ खुवाउने सौभाग्य जुरेको छ ।
भोली दिँउसो १ बजे संसदका सबैभन्दा जेष्ठ सदस्यको हैसियतले अन्य सांसदहरुलाई शपथ खुवाउँदैछन् पशुपति शमशेर राणाले,उनी श्री ३ मोहन शमशेर जङ्गबहादुर राणाका नाति तथा विजय शमसेर जबराका छोरा । संसद सचिवालयले जेष्ठ सदस्यहरुको उमेरमा विवाद निस्किएपछि सक्कल नागरिकता मागेर हेर्दा जेष्ठ सदस्य राणा भएको सचिवालयले निक्र्यौल निकालेको हो ।
नागरिकता अनुसार राणाको उमेर ८१ बर्ष ७ महिना १० दिन पूरा भएको देखिएका कारण उनी नै जेष्ठ सदस्य ठहरिएको संसद सचिवालयले जनाएको छ । भोलि दिँउसो १ बजे अगावै संविधान सभाको जेष्ठ सदस्यको हैसियतले राष्ट्रपतिबाट शपथ लिएर राणाले अन्य २७४ सांसदलाई शपथ खुवाउन लागेका हुन । राप्रपाकोे समानुपातिक तर्फको खस आर्य समूहबाट सांसद चुनिएका राणालाई जेष्ठ सदस्यका रुपमा पहिलो बैठकको अध्यक्षता गर्ने र अन्य सदस्यहरुलाई शपथ खुवाउने अवसर जुरेको हो । राणाले यो जिम्मेवारी बहन गर्न इन्कार गरेको खण्डमा चित्रबहादुर केसीको काँधमा त्यो अभिभारा आइलाग्ने हो ।
सचिवालयले दिएको जानकारी अनुसार राणाभन्दा चित्रहादुर केसी २ महिनामात्र कान्छो हुन । तेश्रोमा महन्थ ठाकुर छन््,जस्ले अघिल्लो पटक अर्थात ०७४ मा जेष्ठ सदस्यका रुपमा अरु सांसदलाई शपथ गराएका थिए । नागरिकता अनुसार सबैभन्दा जेष्ठ (८५ बर्ष) सदस्य देखिन्छन्,महेन्द्र राय यादव तर उनले अघिल्लो पटक (०७४)मै आफू जेष्ठ सदस्य नभएको बताएपछि महन्थका लागि त्यो अवसर जुरेको थियो । महेन्द्र रायका अनुसार नागरिकतामा १९९४ साल वैशाख २४ गते लेखिएको भए पनि उनको वास्तविक जन्ममिति २०११ असार १५ गते हो । यो अनुसार उनी ६८ बर्षका मात्र हुन् । उनीभन्दा रामचन्द्र पौडेल (७८),देउवा (७७) जेठा हुन ।