प्रधानमन्त्री आज यूएई जाँदै,को- को छन् भ्रमण टोलीमा ?

प्रधानमन्त्री पुष्पकमल दाहाल (प्रचण्ड) आज संयुक्त अरब इमिरेट्स जाँदैछन् । संयुक्त राष्ट्रसंघीय जलबायु परिवर्तनको २८ औं सम्मेलनमा सहभागी हुन नेपाली टोलीको नेतृत्व गरेर प्रधानमन्त्री युएई उड्न लागेको हुन ।
Advertisement 1
जलवायु परिवर्तनसम्बन्धी संयुक्त राष्ट्रसंघीय संरचना महासन्धि (युएनएफसीसीसी)का पक्ष राष्ट्रहरुको २८औं सम्मेलन (कोप २८) यही मंसिर १४ देखि २६ गतेसम्म यूएईको दुबईमा हुँदै छ । सोही सम्मेलनमा प्रधानमन्त्री प्रचण्ड नेतृत्वको नेपाली प्रतिनिधिमण्डल सहभागी हुन लागेको हो । प्रचण्ड साढे ९ बजे दुबईका लागि प्रस्थान गर्ने कार्यतालिका रहेको छ ।
प्रधानमन्त्री प्रचण्डसँग मन्त्री र सचिवहरु समेत टोलीमा सहभागी हुँदैछन् । वातावरण मन्त्री वीरेन्द्र महतो, बन तथा वातावरण सचिव दीपककुमार खराल र अर्थ सचिव कृष्णहरी पुष्कर भ्रमण टोलीमा छन् । यस्तै प्रधानमन्त्रीसँग प्रधानमन्त्रीकी छोरी गंगा दाहाल, स्वकीय सचिव रमेश मल्ल, प्रधानमन्त्रीका विकास ब्यवस्थापन तथा वातावरणविद् डा पपुलर जेन्टल भुसाल पनि भ्रमण टोलीमा रहेको प्रधानमन्त्री प्रचण्डको सचिवलायले जनाएको छ ।
Advertisement 2
प्रधानमन्त्री प्रचण्ड १७ मंसिरमा स्वदेश फर्किने कार्यक्रम छ ।