स्थानीय तह चुनावमा उम्मेदवार बन्न राजीनामा दिनुपर्ने निर्वाचन आचारसंहिता रोक्न सर्वोच्च अदालतले अल्पकालीन अन्तरिम आदेश दिएको छ । न्यायाधीश बमकुमार श्रेष्ठको एकल इजलाशले निर्वाचन आचारसंहिता रोक्न अन्तरिम आदेश दिनुका साथैं आचारसंहितामा राजीनामा दिनुपर्ने व्यवस्था राख्नु पर्नाको कारणसहित लिखित जवाफ पेश गर्न भनेको छ ।

Advertisement 1

उम्मेदवार बन्दा बहालवाला जनप्रतिनिधिले राजीनामा दिनुपर्ने निर्वाचन आयोगको आचारसंहिताविरुध्द सिन्धुपाल्चोकको हेलम्बु गाउँपालिकाका अध्यक्ष निमा ग्याल्जेन शेर्पाले रिट निवेदन दायर गरेका थिए । शेर्पाको सो रिटउपर सुनुवाई एकल इजलाशले यस्तो आदेश दिएको हो ।

Advertisement 2

स्थानीय तहको आगामी निर्वाचनमा उम्मेदवार बन्न चाहने बहालवाला जनप्रतिनिधिले राजीनामा दिनुपर्ने भन्दै निर्वाचन आयोगले राजपत्रमा आचारसंहिता प्रकाशित गरेको थियो । सो विरुद्ध सिन्धुपाल्चोकको हेलम्बु गाउँपालिकाका अध्यक्ष शेर्पा सर्वोच्च पुगेका हुन् ।

स्थानीय तहको निर्वाचन आगामी वैशाख ३० गते हुँदैछ । सोही निर्वाचनलाई लक्षित गर्दै आयोगले अस्ति चैत्र २ गते निर्वाचन आचारसंहिता जारी गरेको थियो । सो आचारसंहितामा उम्मेदवार बन्नका लागि बहालवाला उम्मेदवारले राजीनामा दिनुपर्ने उल्लेख गरिएको थियो ।