बुधबारको साँझ बालुवाटारमा बसेको मन्त्रिपरिषद्को बैठकले विभिन्न निर्णय गरेको छ । बैठकले नियुक्ति,बढुवा गर्नेदेखि निलम्बनसम्मका निर्णयहरु गरेको छ ।
क्याविनेट बैंठकले कानूनविपरीत सर्वोत्तम सिमेन्टको शेयर आफन्तको नाममा खरीद गरिदिएको भन्दै विवादमा परेका धितोपत्र बोर्डका अध्यक्ष भीष्म ढुंगानालाई बोर्ड अध्यक्षबाट निलम्बन गरी छानविन समिति गठन गरेको छ । समितिमा उच्च अदालतका पूर्व न्यायाधीश अनन्तराज डुम्रेको अध्यक्षतामा प्राध्यापक नारायणप्रसाद पौडेल र नेपाल कानुन आयोगका सहसचिव अर्जुन कुमार खड्का सदस्य रहेका छन् ।
सरकारले दीगो तथा सम्मानित रोजगारीको लागि सञ्चालित सीप परियोजनाको लागि स्वीस सरकारको अनुदान सहायता करिब १ अर्ब ९३ करोड रुपैया स्वीकृत गर्ने निर्णय गरेको छ ।
यस्तै सरकारले अघिल्लो सरकारले अध्यादेशमार्फत बृद्धि गरेको ३३ प्रतिशतको सामाजिक सुरक्षा भत्तालाई निरन्तरता दिने निर्णय पनि गरेको छ ।

Advertisement 1

क्याबिनेटले मेडिकल काउन्सिलको रिक्त सदस्य पदमा मोरङका  डा.विक्रान्त ढकाल र युवा तथा साना ब्यवसायी स्वरोजगार कोषको कार्यकारी निर्देशकमा कास्कीका विश्वमोहन अधिकारीलाई नियुक्त गरेको छ । यस्तै निर्वाचन आयोगमा कार्यरत सहसचिव राजकुमार श्रेष्ठलाई सचिव पदमा बढुवा गरेको छ ।  नेपाल परराष्ट्र सेवाका दुई उपसचिवलाई सहसचिवमा बढुवा गर्ने निर्णय समेत निर्णय क्याविनेटले गरेको छ । बढुवा हुनेमा उपसचिव कृष्णचन्द्र अर्याल र धनबहादुर वली रहेका छन् ।

बैठकले माओवादी जनयुद्ध र जनआन्दोलनका , मधेश आन्दोलनका घाइते अपांगको पुनःस्थापना हेरचाह, सहायतासम्बन्धी निर्देशिकाको दोश्रो संसोधन २०७८ स्वीकृत गर्ने निर्णय गरेको छ । यस्तै बैठकले पाकिस्तानको माउन्ट के  २को सफल आरोहण गर्ने दावा तेन्जिङ शेर्पाको टोलीलाई प्रोत्साहन स्वरुप जनही १ लाख नगद पुरस्कार दिने निर्णय गरेको छ ।

Advertisement 2

सरकारले चीनसँग सीमा जोडिएको हुम्ला जिल्लाको लिमी लाप्चादेखि हिल्लासम्मको सीमा क्षेत्रको समस्या अध्ययन गर्न समिति बनाएको छ । बैठकले हुम्लामा चीनसँगको सीमा विवाद अध्ययन गर्न समिति गठन गरेको हो । गृह मन्त्रालयका सहसचिवको संयोजकत्वमा नापी विभाग, नेपाल प्रहरी, सशस्त्र प्रहरी र सीमा विज्ञ रहेको समितिले सीमा र स्थानीयको समस्या बारे अध्ययन गरि प्रतिवेदन बुझाउने बैठक पछि कानूनमन्त्री तथा सरकारका प्रवक्ता ज्ञानेन्द्रबहादुर कार्कीले जानकारी दिए ।