चितवन। कालिका पावर कम्पनीको आर्थिक वर्ष २०८१/८२ मा सेयर आम्दानी बढेको छ। अघिल्लो आर्थिक वर्षमा भन्दा गत आर्थिक वर्षमा १५.९५ प्रतिशतले सेयर आम्दानी वृद्धि भएको हो।

Advertisement 1

कम्पनीको १८औँ वार्षिक साधारणसभामा कम्पनीका अध्यक्ष सुरेन्द्र पाण्डेद्वारा प्रस्तुत प्रतिवेदनअनुसार अघिल्लो आर्थिक वर्षमा जम्मा प्रतिसेयर आम्दानी ९.०९ रहेकामा २०८१/८२ मा १०.५४ पुगेको छ। कालिका पावर कम्पनीले गरेको आम्दानी हाइड्रो पावरमा सबैभन्दा राम्रो दाबी गरिएको छ।

कम्पनीले गत वर्षभन्दा यस अर्थिक वर्षमा रु १ करोड ३५ लाख १३ हजार ७७० कूल आम्दानी बढाएको छ। अघिल्लो आर्थिक वर्षमा रु ८ करोड ४९ लाख ८ हजार ५८९ आम्दानी गरेकामा पछिल्लो आर्थिक वर्षमा रु ९ करोड ८४ लाख २२ हजार ३५९ आम्दानी भएको छ।

Advertisement 2

गोरखाको अजिरकोट र वारपाक सुलिकोट (साविकको सिम्जुङ, मुच्चोक र सौरपानी गाविस)को सिमानामा पर्ने दरौँदी नदीबाट ६ मेगावाटको विद्यत् उत्पादन गरिसकेको कालिका पावर कम्पनीले सात प्रतिशत बोनस सेयर वितरण गरेको छ। कम्पनीले विद्यत् बिक्रीबाट मात्रै रु ६ करोड ९३ लाख ६२ हजार ६५१ आम्दानी गरेको छ।

कम्पनीमा कायम रहेको चुक्ता पुँजी रू ९३ करोड ३९ लाख ४९ हजार ५०० को सञ्चित मुनाफाबाट सञ्चालक समितिको निर्णयबमोजिम ७ प्रतिशतले हुन आउने रकम रू ६ करोड ५३ लाख ७६ हजार ४६५ बराबरको सेयर वितरण गर्ने प्रस्ताव पारित भएको प्रतिवेदनमा उल्लेख छ।

गतवर्षको मुनाफाबाट हाल कायम चुक्ता पुँजीको ०.३६८४ प्रतिशतले हुन आउने रकम रू ३४ लाख ४० हजार ८६६ नगद लाभांश वितरण गर्ने प्रस्तावसमेत पारित गरेको छ।

कम्पनीलाई ‘होल्डिङ कम्पनी’को रूपमा विकास गरिँदै

कालिका पावर कम्पनी लिमिटेडले अन्य कम्पनीमा पनि लगानी गर्न कम्पनीको नाम परिवर्तन गरेर ‘होल्डिङ कम्पनी’ बनाउने तयारी गरेको छ। सोमबार नारायणघाटमा सम्पन्न १८औँ वार्षिक साधारणसभाको क्रममा कम्पनीले होल्डिङ कम्पनीको रूपमा विकास गर्न सोहीअनुसारको प्रबन्धपत्र र नियमावलीमा संशोधन गर्न लागेको जनाएको छ।

कम्पनीको साधाणसभामा राष्ट्रिय प्रजातन्त्र पार्टीकी सहमहामन्त्री रीना गुरूङले स्वदेशमै रोजगार दिलाउन र देशमै खेर गइरहेको पानीको सदुपयोग गरी ऊर्जा उत्पादन गर्ने कार्यमा कालिका पावर कम्पनी लागेको हुँदा समग्र देश र जनतालाई नै फाइदा पुग्ने खालको कामप्रति सबैले खुसी मान्नुपर्ने बताउनुभयो। साधारणसभामा कम्पनी सचिव किशोरकुमार डङ्गोलले सभाको वैधानिकताबारे जानकारीसहित स्वागत मन्तव्य दिएका थिए।