काठमाडौं । राजश्व अनुसन्धान विभागले सवा १० अर्ब भन्दा बढी कर छलेको भन्दै अदालतमा मुद्धा दायर गरेको छ । विभागले आइतबार कोटीभिटी नेपाल प्रालि विरुद्ध कर छली अभियोगमा १० अर्ब ३६ करोड ४५ लाख २२ हजार छ सय ४२ सजाय माग दाबीसहित उच्च अदालत पाटनमा मुद्धा दायर गरेको हो ।

Advertisement 1

राजस्व चुहावट (अनुसन्धान तथा नियन्त्रण) ऐन २०५२ ले निषेध गरेको कार्य गरेको पुष्टि भएको भन्दै विभागले मुद्दा दायर गरेको विभागका महानिर्देशक नवराज ढुंगानाले जानकारी दिए । उनका अनुसार विभिन्न आर्थिक वर्षमा शेयर स्वामित्वमा परिवर्तन भएको देखिए पनि कम्पनीको शेयर स्वामित्वमा भएको परिवर्तन अनुसार मध्यम स्तरीय करदाता कार्यालयलगायत विभिन्न निकायमा प्रचलित कर कानुन बमोजिम बुझाउनुपर्ने कर तथा कर राजस्वसमेत नतिरेको भन्दै विभागले अनुसन्धान शुरु गरेको थियो । एउटै व्यवसायिक कम्पनीलाई यति ठुलो मात्राको सजाय मागदावी गरी अभियोग दायर गरेको यो पहिलो पटक भएको महानिर्देशक ढुंगानाको भनाई छ ।

मुख्य कम्पनीको लागि व्यवसायिक कारोबार गर्ने, मुख्य कम्पनीको व्यवसायिक प्रतिनिधित्व गर्ने तथा मुख्य कम्पनीको नेपालस्थित कानूनी रुपमा मान्य प्रतिनिधिसमेत देखिँदा कर असुल गर्नुपर्नेमा असुल गरेको नदेखिएकोले थप अनुसन्धानको लागि अख्तियार दुरुपयोग अनुसन्धान आयोगमा लेखि पठाउने निर्णयसमेत भएको विभागले जनाएको छ ।