पछिल्लो समय राजश्व अनुसन्धान विभाग आक्रामक बन्न पुगेको छ । राजश्व मार्न पल्किएका व्यापारी,उद्यमीदेखि विचौलियाहरु एक पछाडि अर्काे गरी राजश्व विभागको फन्दामा पर्न थालेका छन् ।
विभागको महानिर्देशकको जिम्मेवारी नवराज ढुंगनाले सम्हाल्न पुगेसँगै विभाग राजश्वमाराहरु प्रति आक्रामक ढंगले प्रस्तुत भइरहेको देखिएको छ । झण्डै ६० किलो सुन तस्करी प्रकरणलाई बाहिर ल्याएर राजश्वरामाराप्रति आक्रामक ढंगले अगाडि बढेको विभागले अघिल्लो सातामात्र एडिडास व्राण्डका मालिकविरुद्ध चार करोड बढीको मुद्धा चलाइसकेको छ ।
यस्तै, विभागले अवैध कारोबार गर्ने चार जनाविरुद्ध रु १५ करोड बढी बिगो कायम  मुद्दा दर्ता गरेको छ ।

Advertisement 1

विभागले सिरहाको माडर बस्ने ४७ वर्षीय प्रेमकुमार यादव, सोही ठाउँ बस्ने सञ्जयकुमार साह, पवनकुमार यादव र ४० वर्षीय अरुण यादवविरुद्ध विदेशी विनिमय अपचलन गरी अवैध कारोबार गरेको आरोपमा मुद्दा दर्ता गरेको हो । उनीहरुमध्ये पवन र अरुण भने फरार रहेको विभागका सूचना अधिकारी नवराज अधिकारीले जानकारी दिए ।

प्रहरीले गएको भदौ १५ गते सिरहा नगरपालिका–१५ कालीचौकमा भारतबाट नेपालतर्फ आउँदै गरेको विआर ७ सि ४२२४ नंको कारलाई रोकी जाँच गर्ने क्रममा उक्त कारको चालक बस्नेतर्फको दुईवटा सिटमुनि एक हजार दरका तीन हजार चार सय थान थान (रु ३४ लाख) र पाँच सय दरका दुई हजार थान (रु १० लाख) फेला पारी राजस्व अनुसन्धान विभागमा बुझाएको थियो ।

Advertisement 2

त्यसपछि विभागले गरेको सूक्ष्म अनुसन्धानमा प्रतिवादीहरु प्रेमकुमार यादव, सञ्जयकुमार साह, पवनकुमार यादव र अरुण यादवसमेतको मिलेमतोमा गैह्रकानुनी रूपमा इजाजत प्राप्त नगरी प्रतिवादी प्रेमकुमार यादवले भारतीय नागरिक राजकुमार पासवानबाट उक्त रकम आएको पाइएको अधिकारीले बताए। विभागका अनुसार राजकुमार पासवानबाट प्राप्त गरी अन्य प्रतिवादीहरुलाई दिन बुझाउन बाँकी रहेको रकम रु ८३ लाख ३८ हजारसमेत गरी जम्मा रु एक करोड २७ लाख ३८ हजार बरामद गरिएको थियो । अनुसन्धानका क्रममा प्रतिवादी अरुण यादवको हकमा रु आठ करोड करोड ६५ लाख ६० हजार र प्रतिवादी पवनकुमार यादवलाई रु पाँच करोड आठ लाख ८८ हजार गरी जम्मा बिगो रु १५ करोड एक लाख ८६ हजार आठ सय बराबरको रकम अवैधरुपमा कारोबार गरेको विभागको दाबी छ । प्रतिवादीहरुले विदेशी विनिमय (नियमित गर्ने) ऐन, २०१९ को दफा ९ ‘ग’ बमोजिमको कसुर गरेको वारदात पुष्टि हुन आएकाले सोही अनुसार आज मुद्दा चलाइएको विभागले जनाएको छ ।

यसैबीच राजस्व कार्यालय इटहरीले सोमबारसम्म लगातार तीन दिनमा भारतबाट चोरी पैठारी गरेर भित्र्याएको करिब पौने दुई करोड बराबरको कपडा बरामद गरेको छ । कार्यालयले सिरहा नगरपालिकाको माडर क्षेत्रबाट पछिल्लो पटक आज बिहान करिब २५ लाख बराबरको कपडा बरामद गरेको छ । अस्तिदेखि लगातर गरेको गस्तीका क्रममा सशस्त्र प्रहरीको सहयोगमा राजस्वले सटिङ सुटिङ, सारी, कुर्ता सलवार, धोतीलगायतका कपडा बरामद गरेको छ ।  राजस्व कार्यालय इटहरीका प्रमुख सुरेश आचार्यले तस्करहरूले पटक–पटक चोरी पैठारीमार्फत ठूलो परिमाणमा कपडा नेपाल भित्र्याएको अनुमान रहेको बताए । सिरहाको करिब ४६ किलोमिटर खुला सीमा भारतसॅग जोडिएको छ ।