मधेस प्रदेशका गाउँ दाइजो प्रथाको विकराल समस्या यथावत रहँदा छोरीहरूलाई विद्यालय नपठाउने, बालविवाह गरिदिनेजस्ता प्रवृत्तिले अझै आक्रान्त छन्। तर पछिल्लो समय महोत्तरीमा कैद गरिएको एक तस्बिरले भने छोरीप्रतिकोे जिम्मेवारीलाई अभिभावकले महसुस गरेको देखिन्छ।

Advertisement 1

पत्रकार राजकरण महतोले खिचेको एनसीसी तालिममा सहभागी विद्यालय पढ्ने छोरीहरूको तस्बिर नेपाली सेनाको नोमिनेसनमा परेपछि मधेसमा छोरीप्रतिको दृष्टिकोणमै परिवर्तन विश्लेषण हुन थालेको हो।

तस्बिरमा अधिकाशं छोरीले सैन्य पोसाक पहिरिएका छन्। विद्यालयमा कक्षा लिइरहेका छात्राको यो तस्बिर झट्ट हेर्दा नेपाली सेनाको जस्तै लाग्छ। अनुशासित, सौम्य, उत्सुकता, प्रतिबद्धता व्यक्त गरेजस्तो देखिने तस्बिरले सबैको ध्यान तानेको छ।

Advertisement 2

तस्बिर खिच्ने पत्रकार राजकरणले लेखेका छन्, ‘महोत्तरीको बर्दिवास नगरपालिका–९ पशुपतिनगरस्थित राष्ट्रिय मावि पशुपतिनाथ बनरझुल्लामा खिचेको तस्बिरले छोरीहरूमा राष्ट्रिय भावना मात्रै जगाएको छैन, घरभित्रको अँध्यारो जीवनबाट निस्किएर उज्यालो संसारमा आउन उक्साएको छ।’

तस्बिरबाट प्राप्त पुरस्कारकोे हकदार मधेसका सबै अभिभावक र छोरीहरू भएको भन्दै खुसी व्यक्त गर्दै उनले भनेका छन्, ‘विद्यालय ज्ञानको मन्दिर मात्रै होइन, राष्ट्र भावना विकास गर्ने पुञ्ज पनि हो। त्यसैले हरेक छोरी विद्यालय जानैपर्छ।’

मधेसमा छोरीहरू दाइजो र घरेलु हिंसाको सिकार हुनुपरेको छ। पछिल्लो महोत्तरीकै नेहा चौधरीको घटनाले देशकै ध्यान खिचेको थियो। शिक्षित छोरीले आफूमाथि भएको दमनलाई प्रतिकार गरेको घटना बाहिरिए पनि लुकेका र लुकाइएका कयौं घटनाले उनीहरू अहिले पनि दिनहुँ प्रताडित बनिरहेका छन्।