सरकारले स्थायी सरकारको मेरुदण्ड मानिने मन्त्रालय तथा सरकारी निकायका सचिवहरुलाई हावाकावा खेलाउन छाडेको छैन । आफ्नो इच्छाअनुसार मन्त्रीहरुले सचिव फेर्न थालेपछि उनीहरु फुटबल खेलमा हानिएको भकुण्डोजस्तै भएका हुन् ।

Advertisement 1

गत सातादेखि शिक्षा मन्त्रालयका सचिव यादव कोइरालालाई प्रधानमन्त्री तथा मन्त्रिपरिषद् कार्यालयमा पुर्याइएको छ । वामनिकट प्रष्टवक्ता भनेर चिनिएका कोइरालालाई अहिलेको सरकारले झैँ पहिले एमाले अध्यक्ष केपी शर्मा ओली नेतृत्वको सरकारले पनि यसैगरी भकुण्डो बनाएको थियो ।

कोइरालालाई शिक्षाबाट साउन २ गते झिकिएको हो । उनले मन्त्री देवेन्द्र पौडेललाई शुरुका दिनमा आफू बाधक बन्नसक्ने भएकाले अरुलाई नै रोज्न आग्रह गरेका थिए ।
तर त्यतिबेला पनि उनलाई जर्बजस्ती शिक्षामा लगिएको प्रधानमन्त्री कार्यालय स्रोतले बताएको छ ।

Advertisement 2

कोइरालाले मन्त्री पौडेलसँग पहिले राखेको शर्त उद्धृत गर्दै स्रोत बताउँछ, ‘मन्त्रीज्यू म नजराना चढाउन सक्दिन । कसैको आग्रहमा पैसा उठाउन सक्दिन । कसैलाई सहज बनाइदिन कानुन मिच्न आउँदैन र मन्त्रीबाहेक पार्टीका आसेपासेले अह्राएको काम पनि गर्दिंन ।’

कोइरालालाई हटाएपछि अहिले त्यहाँ सचिव रामकृष्ण सुवेदीलाई लगिएको छ । सुवेदी उपराष्ट्रपतिको कार्यालयमा थिए । यसबीच कर्णाली प्रदेशबाट राजकुमार श्रेष्ठलाई तानेर लोकसेवा आयोग लगिएको छ भने हालै बढुवा भएका डा गोपीकृष्ण खनाललाई कर्णाली पुर्याइएको छ ।

यता अस्तिदेखि रिक्त पर्यटन सचिव महेश्वर न्यौपानेको ठाउँमा कसैलाई पनि लगिएको छैन । मालदार मन्त्रालय भएकाले सचिवहरुको दौड जारी छ ।