मरिसकेका मान्छेविरुद्ध पनि अख्तियारले चलायो मुद्दा
अख्तियार दुरुपयोग अनुसन्धान आयोगले मृत्यु भइसकेको व्यक्तिलाई समेत भ्रष्टाचार मुद्धा चलाएको भेटिएको छ । सरकारी जग्गा हडपेको मुद्धा २७ बर्ष पछि व्युताउँदै अख्तियारले सो प्रकरणमा जोडिएका तर मृत्यु भइसकेका तीन जना व्यक्ति उपरसमेत मुद्धा चलाएको हो ।
जग्गा भोग चलन भएको करिब २७ वर्षपछि अख्तियार दुरुपयोग अनुसन्धान आयोगले सार्वजनिक जग्गा हडपेको आरोपमा १३ जना विरुद्ध मुद्दा दायर गरेको छ । जसमध्ये तीन जना ज्यान गुमाइसकेका छन् । तनहुँको शुक्ल गण्डकी नगरपालिका–१६ मा रहेको हिमाली प्रावि व्यवस्थापन समितिको निर्णय अनुसार १३ जनाले सार्वजनिक जग्गा भोग चलन गरेको भन्दै अख्तियारले अभियोग लगाएको छ । २०५१ सालको बैशाख ११ गते तनहुँ स्थित शुक्लागण्डकी नगरपालिका १६ को हिमाली प्राविको विद्यालय व्यवस्थापन समितिले निर्णय गरेर सार्वजनिक जग्गा बिक्री गरिदियो । साविक ढोरफिर्दी गाविसमा रहेको जग्गा विभिन्न ब्यक्तिलाई घरसारको कागज बनाई गैरकानुनी रुपमा जग्गा बेचेपछि समितिविरुद्ध उजुरी पर्यो ।
Advertisement 1
समितिका तत्कालीन अध्यक्ष याम बहादुर बानिया, सदस्य सचिव (प्रधानाध्यापक) याम बहादुर ठकुरी सहित ७ जना विरुद्ध उजुरी परेको थियो । समितिका सदस्यहरु घनश्याम बानिया, हरि कुमारी महत, धुन बहादुर पुलामी, ज्ञान बहादुर बानिया र खडक बहादुर बानिया सहितले १ लाख ६९ हजार रुपैयाँ लिएर सरकारी जग्गा भोगचलन गर्ने गराउने गरेको अख्तियारको अनुसन्धानबाट खुलेको छ । विक्रि भएको जग्गाको १ लाख ६९ हजार विगो कायम गरेर उनीहरु विरुद्ध विशेष अदालतमा मुद्धा दर्ता गरिएको हो । आरोपित मध्ये याम बहादुर, धुन बहादुर, ज्ञान बहादुर र खडक बहादुरको मृत्यु भैसकेको छ । मृत्यु भएपनि उनीहरुले भ्रष्टाचार गरेको देखिएकोले उनीहरुसँग मागदावी लिइएको छ ।
सार्वजनिक जग्गालाई घरसारको कागजातहरु बनाई आँफैले घडेरी नम्बर कायम गरेर भोगचलन गरेको आरोपमा खरिद गर्नेहरुलाई समेत अख्तियारले आरोपी बनाएको छ । सन्त बहादुर सिजालीमगर, तिलुदेवी वराल, डोलराज आचार्य, डिल बहादुर आले, विष्णुमाया थापा, विष्णु प्रसाद लम्साल, शरण बहादुर बिक, बलराम वानिया, बुद्दिमाया बिक, बाबुराम बानिया, लोक बहादुर माकिम, पूर्ण बहादुर बिक र धन बहादुर बिकले विद्यालय व्यवस्थापन समितिलाई पैसा दिएर जग्गा भोग चलन गरेका थिए । उनीहरुलाई मतियारको रुपमा कारबाही माग गरिएको छ । भोगचलन गरिरहेकाहरुबाट जग्गाको भोग हटाई जफत गर्न माग गरिएको अख्तियार प्रबक्ता श्यामप्रसाद भण्डारीले जानकारी दिए । भोगचलन गरेका मध्ये लोक बहादुर, डोलराज र धन बहादुरको मृत्यु भैसकेको छ ।
Advertisement 2
